اتوار , 1 نومبر 2020
ensdur

گوجرانوالہ میں اپوزیشن کا پاور شو | ملک سراج احمد

تحریر: ملک سراج احمد

ہونٹوں پہ کبھی ان کے میرا نام ہی آئے ،، آئے تو سہی برسرالزام ہی آئے جیسا شہرہ آفاق شعر پی ڈی ایم کے گوجرانوالہ کے جلسہ میں مسلم لیگ ن کے قائد میاں نوازشریف کی طرف سے کی جانے والی تقریر کی بھرپور عکاسی کررہا ہے ۔وہ بات جس کو زیرلب کہتے ہوے بھی سیاسی قیادت تذبذب کا شکار رہتی تھی وہی بات کل برسر عام ہوئی ہزاروں لاکھوں کے مجمع کے سامنے ہوئی ببانگ دہل ہوئی۔ پہلی بار ملک ے سرونگ چیف کی کارکردگی پر سوال اٹھائے گئے ان سے جواب طلب کیا گیا۔پہلی بار عمران خان کی حکومت کی سرپرستی کا الزام لگا کر ملکی حالات کی ابتری کا زمہ دار قرار دیا گیا۔پی ڈی ایم قائدین کے لہجوں کی تلخی میں اضافہ اس بات کی تصدیق کررہا ہے کہ آنے والے دنوں میں لہجے زیادہ تلخ اور کڑوے ہوں گے۔

گوجرانوالہ میں اپوزیشن کا پاور شو خوب رہا۔اپوزیشن جماعتوں نے مکمل تیاری کے ساتھ اس میں شرکت کی اور عوام نے ان کا بھرپور ساتھ دیا۔بلاول بھٹو زرداری کی لالا موسٰی سے ریلی کے ساتھ روانگی اور مریم نواز کی جاتی عمرہ اور مولانا فضل الرحمن کی لاہور سے ریلیوں کےساتھ گوجرانوالہ روانگی کے بعد لاہور تا جہلم جی ٹی روڈ جلسہ گاہ کا منظر پیش کررہی تھی۔ان ریلیوں نے خوب رنگ جمایا اور اپوزیشن جماعتوں کے ورکرز نے دل کھول کر شرکت کی۔قطع نظر اس کے کہ جلسہ میں شرکا کی تعداد کتنی تھی یہ بات زیادہ اہم ہے کہ ن لیگ اور پیپلزپارٹی نے پنجاب میں کم بیک کیا ہے اور ورکرز کو نکالنے میں کامیاب رہی ہیں۔یہ بات ان جماعتوں کے لیے حوصلہ افزا ہے۔

اے پی سی میں جہاں پی ڈی ایم کی داغ بیل ڈالی گئی تھی میں بھی نواز شریف کی تقریر ٹرمپ کارڈ ثابت ہوئی تھی۔اس تقریر کے بعد نوازشریف کے سیاسی مستقبل پر سوالیہ نشان لگ گیا تھا کہ ان کا سیاسی مستقبل کیا ہوگا۔مگر گوجرانوالہ اسٹیڈیم میں پی ڈی ایم کے جلسہ میں نواز شریف نے ایک بار پھر نیازی الیون کو آڑے ہاتھوں لیتے ہوئے ہر بال باونڈری کے باہر پھینکی۔یہی نہیں بلکہ اسی بیانیے کے ساتھ بلاول بھٹو زرداری اور مولانا فضل الرحمن نے بھی جارہانہ بیٹنگ کرتے ہوے خوبصورت اسٹروک کھیلے۔ بلاول بھٹو زرداری نے مقبوضہ کشمیر کو خاص طورپر فوکس کیا اور ایک بار پھر کشمیر کا مقدمہ خوبصورت انداز میں پیش کرکے پاکستانیوں اور کشمیریوں کے دل جیت لیئے ۔مولانا فضل الرحمن نے عوام کے حق حکمرانی پر کسی قسم کے سمجھوتے کو رد کرتے ہوئے سول سپرمیسی اور رول آف لا کے حق میں خوب بولے۔

18 اکتوبر کو کراچی میں پی ڈی ایم کا دوسرا پاور شو ہوگا ۔پہلے شو کے بعد یہ اندازہ لگانا اب مشکل نہیں کہ یہ دوسرا شو بھی کامیاب ہوگا۔کراچی کے ہوم گراونڈ اور ہوم کراوڈ پر بلاول بھٹو کی بیٹنگ دیکھنے لائق ہوگی۔لیکن سوال یہ پیدا ہوتا ہے کہ پی ڈی ایم جس بیانیے کے ساتھ نکلی ہے کیا یہ ملک اور اس کا نظام اس بیانیے کا متحمل ہوسکتا ہے ۔اداروں کو ان کے آئینی کردار تک محدود کرنے کی بات مقتدر حلقوں کے لیئے کس قدر قابل قبول ہوگی۔سول سپرمیسی کے جس ایجنڈے کو لے کر اپوزیشن نکلی ہے کیا وہ شرمندہ تعبیر ہوگا۔رول آف لا اور عوام کے حکمرانی کو کون کیسے اور کیوں کر تسلیم کرئے گا۔بالفرض محال اگر طاقت اور اختیار عوام کے ہاتھ میں آ بھی گیا تو ملک کا سیاسی منظر نامہ کیا ہوگا۔میرا خیال ہے کہ اب وقت آ گیا ہے کہ ان سوالات کے مدلل جواب تلاش کیئے جائیں ۔غصہ اور ناراضگی کسی بھی مسلئے کا حل نہیں ہے ہمیں مل بیٹھ کر اس موضوع پر بات کرنی ہوگی۔ زمینی حقائق اور دلائل کی بنیاد پر نیا بیانیہ تشکیل دینا ہوگا ایک ایسا بیانیہ جس پر پوری قوم کا اتفاق ہو۔

کوئی نواز شریف کی تقریر سے اتفاق کرئے یا اختلاف کرئے مگر یہ سوال تو بنتا ہے کہ پاکستان کی گزشتہ سات دہائیوں میں صرف سیاست دان ہی کیوں غدار قرار دئیے گئے۔کیا وقت نہیں آگیا کہ غداری کے لفظ کی دوبارہ سے تشریح کی جائے اور اس کے معنی کی وضاحت کی جائے۔کیا یہ حقیقت نہیں کہ شیخ مجیب الرحمن،حسین شہید سہروردی ، فضل حق،باچا خان ، نوازشریف،محترمہ بے نظیر بھٹو،نواب اکبر بگٹی سمیت مری، مینگل اور بزنجو ملک دشمن اور سکیورٹی رسک قرار پائے۔کیا اینٹی اسٹیبلشمنٹ ہونا ملک دشمن ہونے کے مترادف ہے۔اگر اس کا جواب ہاں ہے تو پھر ملک کے آئین کا کیا کیا جائے اور اگر جواب نہیں ہے تو پھر ماضی میں یہ سب کچھ کیوں ہوا اور اس کا زمہ دار کون ہے۔

بات اگر حساب کتاب کی چل نکلی ہے تو پھر یاد رہے کہ یہ بات بہت دور تلک جائے گی ۔بہت سے حقائق سامنے آئیں گے اور بہت کچھ عوام کو پہلی بار معلوم ہوگا۔ہوسکتا ہے کہ اس کے بعد عوام یہ سوال کرنے میں حق بجانب ہوں کہ ملک کے 14 وزرائے اعظم کیوں برطرف ہوئے۔ملک کے چار وزرائے اعظم کی لاشیں ،تین دہائیوں پر محیط مارشل لا آئے روز غداری کے الزامات کے تحت سیاسی قیادت کی تذلیل کا الزام کس پر دھرا جائے اور کس سے جواب طلب کیا جائے۔اب تک کچھ بھی تو ٹھیک نہیں ہوا محض زاتی پسند نا پسند کی بنیاد پر حکومتوں کو گرایا اور بنایا گیا۔طاقت اور اختیار کا یہ گھناونا کھیل دہائیوں سے جاری ہے کیا وقت نہیں آ گیا کہ اس سلسلے کو اب رک جانا چاہیے۔ہمیں بالآخر اپنی سیاسی سمت کا تعین کرنا ہوگا۔آج نہیں تو کل ہمارے مقتدر حلقوں کو عوام کے حق حکمرانی کو تسلیم کرنا ہوگا۔آئینی حدود کی پاسداری کرنی ہوگی۔صرف اور صرف عوام کی فلاح وبہبود سے متعلق سوچنا ہوگا۔بلاول بھٹو کے مطابق شہزادوں کی گاڑی ڈرائیو کرنے سے خارجہ پالیسی نہیں بنتی ہمیں نئے سرے سے دنیا کے ساتھ روابط کے لیئے اپنی ترجیحات کا ازسر نو تعین کرنا ہوگا۔خط غربت سے نیچے زندگی گذارنے والے پاکستانیوں کی بہتر زندگی کے لیے جدوجہد کرنی ہوگی۔اور یہ سب کچھ کون کرئے گا تو عرض ہے کہ یہ صرف اور صرف عوام کے منتخب نمائندے کریں گے۔

برائے رابطہ 03334429707

واٹس ایپ 03352644777

تعارف Editor

یہ بھی چیک کریں

Slip of Toungue or Slip of mind | لاریب مشتاق

تحریر: لاریب مشتاق ہٹلر کا قول ہے کہ کسی بھی ملک کو شکست دینے کا …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے